Edito
Forget-Me-Not / Oubli Pa Mwin sa lé in projé lasosiasion Objet Témoin ASBL la pensé èk la mèt enplas, son bazman lé Brisèl an Bèljik. Nou lé fièr nou la gayin rasanblé in rézo partnèr asosyatif semnb privé èk piblik internasyonal, krédib & méritan.
Lo projé la komansé an 2021 ensuivan bann rosèrs in gob profésèr Capeline-Afac974. La démaré si léritaz bann travayèr kann Larényon dann tan lontan diznévyèm syèk. Zordi lo projé la grandi si trwa kontinan, dan Loséan Indyin, an Lerop èk dann Karayib. An 2022, nou la kréé in lasosiasion non likrative pou okip bann zinvestisman pou bann shantyé nou fé, episa nou la mèt léfor piblyé dosi doweb semnb bann rézo sosyo po kozé èk nout bann partnèr mé sirtou nout piblik.
Nou aspèr kont si zot pou soutyin anou, pou aprésié nout léfor oubiensa rojoign anou an dalon.
Nou artrouv.
Nout Rosèrs
Pou konpran myé léritaz bann travayèr kann dann bann zil kréol, i fo artourn an aryèr dann tan ziska in lépok la foto téi komans apèn néte, ètidyé bann tèks, bann gravir èk bann zakwarèl dalor, épisa rod konblé tout bann zafèr nou koné pa ké tan la lésé dèryèr...
Tintir
Dann diznévyèm syèk, sou linpilsyon gouvèrnèr Olandé Johannes Van Den Bosch, Lo Péiba la ranforsé zot lékonomi kolonyal, sirtou an métan larzan dan plantaz lindigo si Java semnb dann bann zil zordi nou té apèl Lindonézi. Dann bann koloni fransé, bann propriyétèr téi dwa fourni la "twal blé" zot bann zouvriyé pou zot zabiyman.
Listwar
Lo vin Désanm mil uit san karant uit, La Répiblik Fransé la tir lésklavaz si Lil Larényon, mé la révolisyon indistriyèl lé an plin balan, épisa i domann toultan plis min dèv. Pou kontinyé grandi zot zafèr, bann zéksploitan i anbosh an kantité bann "zangajé", ké téi sort Lind, Madasgascar, La Shinn, Lindonézi oubiensa dot koloni ankor. In bon paké la rèsté.
Mod kréolizé
Ant Lond èk Pari, bann modis lé an kompétisyon pou abiyé bann bourzoi ké la gayn fortine èk lindistri la mont an flèsh semnb larzan bann koloni. Bann mèm famiy la, zot téi fé zot voyaz in kou an Lerop, in kou dann bann koloni, zot téi amèn èk zot zot manyir abiyé épisa défoi zot téi donn zot réstan zabi èk zot vyé palto zot bann domestik èk zot famiy, ké téi ramasé pou zot èk téi aranz sa an zot fason.
Séans Foto pou Dokimantasyon & Rokonstitisyon
Nout bann zékip i travay min dan la min èk zournalis indépandan semnb bann fotograf profèsyonèl pou akonpli bann klishé ot rézolisyon do toute bann zétap shantyé, rokonstitisyon si bann modèl vivan semnb zilustrasyon pou partaz la konésans, semnb in takon rosours dijital.
